महेन्द्रनगर । नेकपा एमालेले कञ्चनपुरका तीनै निर्वाचन क्षेत्रमा उम्मेदवारी दर्ता गरेसँगै चुनावी तयारीलाई तीव्र बनाएको छ । मंगलबार एमालेले ¥यालीसहित तीनै निर्वाचन क्षेत्रमा उम्मेदवारी दर्ता गराएको हो ।
एमालेले कञ्चनपुर–१ मा विघटित प्रतिनिधिसभा सदस्य समेत रहेका तारा लामा तामाङलाई उम्मेदवार बनाएको छ भने कञ्चनपुर–२ मा युवा नेता बचन बहादुर सिंहलाई अघि सारेको छ । त्यस्तै कञ्चनपुर–३ मा पूर्व सांसद डा. दीपकप्रकाश भट्टलाई उम्मेदवारका रूपमा प्रस्तुत गरिएको छ ।

एमालेका उम्मेदवारहरूले विगतमा सुरु गरिएका कामको निरन्तरतासँगै नयाँ प्रतिबद्धता अघि सारेका छन् । उम्मेदवारी दर्तापछि कञ्चनपुर–१ का उम्मेदवार तामाङले दक्षिणी क्षेत्रको विकासप्रति आफू प्रतिबद्ध रहेको बताएका छन् ।

संसद विघटनका कारण विकास योजनाहरू अधुरै रहेको स्मरण गराउँदै उनले पक्की सडक, पुल, दोदा नदीमा तटबन्ध निर्माणलगायत पूर्वाधार विकासका काम अघि बढिरहेको बताए ।
सुदूरपश्चिम प्रदेश सरकारका पूर्वमन्त्री समेत रहेका तामाङले आफ्नो कार्यकालमा दक्षिणी क्षेत्रको सडक विस्तार र स्तरोन्नति, दोदा नदीमा तटबन्ध निर्माण कार्यलाई उच्च प्राथमिकतामा राखिएका थिए । 

त्यस्तै कञ्चनपुर–२ का उम्मेदवार युवा नेता सिंहले आफूलाई जनसेवकका रूपमा प्रस्तुत गर्दै क्षेत्रको विकासका लागि दृढ संकल्पित रहेको बताए । जनताबाट सेवा गर्ने अवसर प्राप्त हुनेमा विश्वास व्यक्त गर्दै उनले पूर्वाधार विकास, युवालाई रोजगारी, वृद्धवृद्धालाई सहारा तथा बालबालिकाका लागि गुणस्तरीय शिक्षाका कार्यक्रम अघि सारे ।

कञ्चनपुर–३ का उम्मेदवार तथा पूर्व सांसद डा. भट्टले विगतमा सुरु भए पनि अधुरा रहेका योजनाहरू सम्पन्न गर्ने प्रतिबद्धता जनाएका छन् । उम्मेदवारी दर्तापछि उनले निर्माणाधीन मझगाउँ विमानस्थल, सुख्खा बन्दरगाह तथा महाकाली करिडोर छिटो सञ्चालनका लागि पहल गर्ने बताए । उनले २०७४ सालको आम निर्वाचनमा निर्वाचित भएपछि ती योजनाको निर्माणमा जोड दिएका थिए । 

कैलालीस्थित गेटा मेडिकल कलेजलाई सुदूरपश्चिमकै पहिलो चिकित्सा विश्वविद्यालयका रूपमा विकास गर्न अभियान थालेका भट्टले महाकाली र सेती प्रादेशिक अस्पताललाई टिचिङ अस्पतालका रूपमा अघि बढाउने प्रस्ताव गरेका छन् । साथै सुदूरपश्चिम विश्वविद्यालयमा प्राकृतिक विज्ञान अध्ययनका लागि नयाँ कार्यक्रम सञ्चालनबारे छलफल भइरहेको जानकारी पनि उनले दिए ।

 

चुनावी तयारी तीव्र पारिने
उम्मेदवारी दर्तापछि चुनावी तयारीलाई तीव्र बनाइने नेकपा एमाले कञ्चनपुरले जनाएको छ । एमाले कञ्चनपुरका उपाध्यक्ष तथा प्रचार विभाग प्रमुख जनकराज अवस्थीले पार्टीको चुनावी तयारीका लागि आन्तरिक योजना निर्माण भइरहेको बताए ।

तीनै निर्वाचन क्षेत्रमा उत्साहपूर्ण रूपमा उम्मेदवारी दर्ता गरिएको उल्लेख गर्दै अवस्थीले पार्टी परिचालनका लागि जिम्मेवारी बाँडफाँट तथा चुनावी कार्यक्रमको कार्ययोजना तयार भइरहेको जानकारी दिए ।
साथै तीनै निर्वाचन क्षेत्रमा एमालेका उम्मेदवार विजयी हुने उनको दाबी समेत छ ।