काठमाडौं - पाँच दलीय सत्ता गठबन्धनको आगामी निर्वाचनका सम्बन्धमा बनेको कार्यदलको दोस्रो बैठक बस्दैछ ।  

प्रधानमन्त्री निवास बालुवाटारमा दिउँसो २ बजे बस्ने बैठकमा आगामी आमनिर्वाचनमा गठबन्धनमा रहेका दलहरुबीच चुनावी तालमेलको खाका बनाउनेलगायत विषयमा छलफल हुने बताइएको छ ।बैठकमा गठबन्धनलाई चुनावी तालमेलका साथै संविधान कार्यान्वयन र जनजीविकाका विषय सम्बोधनमा समेत कार्य गर्ने गरी अघि बढाउनुपर्नेलगायत विषयमा छलफल हुने कार्यदलका सचिव अधिवक्ता केशवराज जोशीले जानकारी दिए  ।कार्यदलले निर्वाचनमा सिट बाँडफाँटको खाका बनाएर गठबन्धनका शीर्षनेताहरूलाई बुझाउनेछ ।

यसअघि बसेको गठबन्धनका शीर्षनेताको बैठकले ११ सदस्यीय कार्यदल गठन गरेको थियो । ११ सदस्यीय कार्यदलमा कांग्रेस महामन्त्री थापासहित सञ्चार तथा सूचना मन्त्री ज्ञानेन्द्रबहादुर कार्की, कृष्णप्रसाद सिटौला, नेकपा (माओवादी केन्द्र)का नेताहरू देव गुरुङ, वर्षमान पुन, नेकपा (एकीकृत समाजवादी)का नेताहरू वेदुराम भुषाल, प्रमेष हमाल, जनता समाजवादी पार्टीका नेताहरूबाट रामसहायप्रसाद यादव र रकम चेम्जोङ छन्।  यसैगरी, राष्ट्रिय जनमोर्चाबाट हिमलाल पुरी र आनन्द शर्मा कार्यदलमा छन्।उक्त पहिलो बैठकले कार्यदलको संयोजकमा कांग्रेसका पूर्वमहामन्त्री सिटौलालाई चयन गरेको थियो ।