काठमाडौं । सत्तारुढ नेकपा एमालेको केन्द्रीय कमिटी बैठक आजबाट सुरु भएको छ । बैठकमा पार्टी अध्यक्ष केपी शर्मा ओलीले समसामयिक राजनीतिक परिस्थितिबारे मौखिक ब्रिफिङ दिएका छन् भने उपाध्यक्ष विष्णु पौडेलले विधान संशोधन प्रतिवेदन र महासचिव शंकर पोखरेलले संगठनात्मक प्रतिवेदन प्रस्तुत गरेका छन् ।

पार्टी पोलिटब्युरो सदस्य सूर्य थापाका अनुसार, ओलीले माओवादी केन्द्रसँगको एकता, त्यसपछि देखिएका चुनौतीहरू, र माधव नेपाल–झलनाथ खनाल समूहको भूमिकाबारे विस्तृत धारणा राखेका थिए । बैठक अहिले खाजाका लागि स्थगित भएको छ, खाजा पछि केन्द्रीय सदस्यहरूले धारणा राख्ने कार्यक्रम तय गरिएको छ ।

बैठक पार्टी मुख्यालय च्यासलमा बन्दसत्रका रूपमा भइरहेको छ, जसमा सञ्चारकर्मीलाई प्रवेश अनुमति दिइएको छैन । सञ्चारकर्मीहरू मुख्य गेटबाहिरै कुरिरहेका छन् ।